ՀԱՅ ԵՎ ԲԱՆԱԿԱՆՈՒԹՅՈՒՆ, ՀԱՅԱՍՏԱՆ ԵՎ ՀԱՐԱՏԵՎՈՒԹՅՈՒՆ

Wednesday, September 21, 2011 ԳԱՎԱՌ ԳՐԱԴԱՐԱՆ ՄՇԱԿՈՒՅԹ No Comments

Սեպտեմբերի 20-ին Գավառի քաղաքային գրադարանում կազմակերպվել էր ցերեկույթ <<Եռագույն դրոշ մեր ազատության>>

խորագրով:

Միջոցառման մասնակիցները գրադարանի կրտսեր եւ միջին տարիքի ընթերցողներն էին: Ցերեկույթի հիմնական առանցքը հայն էր

ու հայրենիքը, Հայաստանն ու հայրենի տունը: Իրենց ելույթներով ու ընթերցումներով մասնակիցները եւս մեկ անգամ հավաստեցին, որ Հայաստանն ու հայրենիքը սկսվում է հայրենի քաղաքից ու ամփոփվում աշխարհով մեկ սփռված հայկական օջախով: Մի սրտի չափ Հայաստանը տոնում է իր անկախությունը, իսկ անկախությունը գին չունի, որը դժվարություններով, մաքառումներով է ունեցել Հայաստանը:

Մասնակիցները ընթերցեցին ՀՀ անկախության հռչակագիրը, որին հաջորդեց մասնակիցների միասնական ու հայաշունչչ քոչարին:

Հայ եւ բանականություն, Հայաստան եւ հարատեւություն... այս անհերքելի ճշմարտությունն էին հնչեցնում կրտսեր մասնակիցները:

Եվ նրանց մանուկ հոգում, սկսած գրադարանից, անդրդվելի նստվածք է տալիս հայրենիք Հայաստանը գրչով եւ սրով փրկելու վեհ գաղափարը:

Հնչեցին հայ մեծանուն գրողների հայրենասիրական բանաստեղծությունները: Հայրենասիրական երգեր ու ոգեշունչ ազգային պարեր ներկայացվեցին:

Միջոցառումը կազմակերպել էին գրադարանավարներ Նունե Գեւորգյանը եւ Շուշան Ցոգոլակյանը: Ցերեկույթի ավարտին կազմակերպիչները ներկայացրեցին օրվա գրադարանի <<Կենաց ծառը>>, որի պտուղները փոխարինում էին Գարեգին Նժդեհի հայրենասիրական ու ցեղակրոն մտքերը: Ցերեկույթի մասնակիցներն ու հանդիսատեսը համտեսեցին ծառի բարը` բարձրաձայն ընթերցելով Նժդեհյան գաղափարախոսությունները:

<<Սուրը, թե` գրիչը: Թե մեկը, թե մյուսը- ես սիրեցի ու գործածեցի երկուսն էլ: Սուր ու գրիչ-աստվածային զենքեր` տրված մարդուն` պաշտպանելու իրավունքն ու սրբությունն աշխարհում>>,- այսպես եզրափակվեց օրը:

Գավառի քաղաքային գրադարանի տնօրենը Ժաննա Ղուլոյանը <<Գեղամա աշխարհին>> հայտնեց, որ գրադարանը մասնակցել է միջհամայնքային մշակութային առաջին <<Արտէքսպո>> ցուցահանդեսին, որտեղ էլ իրենց ներկայացրած տաղավարը հավակնում է հաղթել «Լավագույն գրադարան>> անվանակարգում:

Անի Պողոսյան