Հերթական զոհը բանակում

Saturday, July 02, 2011 Լուրեր, Հասարակություն, Պատահար, Սյունիք No Comments

Կապանում տեղակայված  ՀՀ ՊՆ N զորամասի հարակից անտառում հունիսի 29-ին, ժամը 13:15-ին հայտնաբերվել էր պարտադիր ժամկետային զինծառայող Տիգրան Համբարձումյանի դիակը: Նա բանակ էր զորակոչվել Մասիսի Նորաբաց գյուղից: Տիգրանը 5-6 ամսից պիտի զորացրվեր: Գյուղացիները մեր թղթակցին պատմել են, որ Տիգրանը զորամասից դուրս, ծառայակիցների հետ զինավարժությունների է եղել: Նախնական վարկածով, նա ինքնասպանություն է գործել: Դեպքի  վայրում հայտնաբերվել է ածելի, իսկ դիակի զննությամբ` ձախ ձեռքի արմնկափոսի շրջանում լայնակի  վերք` հարթ եզրերով: Զինվորը լքել էր զորամասի տարածքը: Նրա ծնողները նշում են, որ մինչ այդ նա կոնֆլիկտ է ունեցել հրամանատարական կազմի հետ, որի պատճառներն առայժմ հայտնի չեն: Նրանք համոզված են, որ իրենց որդին ինքնասպանություն գործել չէր կարող: Դեպքի առիթով ՀՀ  Քր. Օր. 110 հոդվածի առաջին  մասի/ինքնասպանության հասցնել/ հատկանիշներով քրեական գործ է հարուցվել:

Read More

Կապանի դաշնակցական քաղաքապետը բարկացել է

Friday, July 01, 2011 Լուրեր, Հասարակություն, Սյունիք No Comments

Նկարում` Գագիկ Ղահրամանյանն ու Արտուր Աթայանը

Կապանի քաղաքապետարանի քաղաքաշինության եւ ճարտարապետության բաժնի պետ Վիլեն Բադալյանի հրաժարականին օրերս հաջորդեց փոխքաղաքապետ Գագիկ Ղահրամանյանի հրաժարականը:  

 

Սա արդեն նշանակում է, որ հանրապետության միակ դաշնակցական Կապանի քաղաքապետ Արտուր Աթայանի թիմում պառակտում է սկսվել:  

 

Գ. Ղահրամանյանը քաղաքապետի մտերիմ ու կուսակացական ընկերն է եղել, եւ նախընտրական շրջանում ամեն ինչ արել է թեկնածուի ընտրվելու համար: Նախկին փոխքաղաքապետը հրաժարականը բացատրում է ներկուսակցական խնդիրներով ու պատրաստվում է զբաղվել կուսակացական գործերով: Իսկ Կապանում տարածված լուրերի համաձայն, Վիլեն Բադալյանն ու Գագիկ Ղահրամանյանը հողհատկացման ոլորոտում « մութ գործարքներ են արել», ինչը բարկացրել է Կապանի քաղաքապետին: Վերջինիս որոշմամբ փոխքաղաքապետ է նշանակվել կոմունալ տնտեսության արդեն նախկին պետ, ՀՅԴ անդամ Վարդան Գևորգյանը:

Read More

Սպասում են արդյունքներին. աղջիկներին վտանգ չի սպառնում

Tuesday, June 21, 2011 Արագածոտն, Լուրեր, Հասարակություն, Սյունիք No Comments

Օրերս անդրադարձել էինք Աշտարակում 4-ամյա աղջնակի դեմ կատարված սեռական ոտնձգությանը՝ նշելով, որ ապացույցների բավարար չլինելու պատճառով քրեական գործ չի հարուցվել: Սակայն մեր հրապարակումից հետո ոստիկանությունը պաշտոնապես հայտարարեց, որ մայիսի 31-ին Աշտարակի ոստիկանություն է դիմել քաղաքացի Լուսինե Հ.-ն եւ հայտնել, որ իր անչափահաս դստեր նկատմամբ սեռական բնույթի գործողություններ են կատարել: 

Կինը տվյալ արարքի մեջ մեղադրել է 54-ամյա Ռուբիկ Պ.-ին: Հունիսի 1-ին հարուցվել է քրեական գործ քրօր. 139 հոդվածի 3-րդ մասի հատկանիշներով (մինչեւ 14 տարեկան անձի նկատմամբ սեքսուալ բնույթի բռնի գործողություն կիրառելը): Կասկածյալն ազատության մեջ է, ու խափանման միջոց չի ընտրվել: Նախաքննական մարմինը սպասում է դատակենսաբանական ու դատահոգեբանական փորձաքննությունների արդյունքներին, որի համար, ըստ մասնագետների, կոնկրետ ժամկետ սահմանված չէ, սակայն պատասխանները պետք է տրվեն ողջամիտ ժամկետներում: 

ՀՀ դատական բժշկության հանրապետական գիտագործնական կենտրոնի տնօրեն, գլխավոր դատաբժիշկ Շոթա Վարդանյանը լրատվամիջոցներին տեղեկացրել էր, որ աղջկա հետ սեռական հարաբերություն չի եղել: «Երեխայի սեռական օրգանները չեն վնասվել, եթե 50 տարեկան մարդը 4 տարեկան երեխայի հետ հարաբերություն ունենա, երեխան այնպիսի կոպիտ կոտրվածքներ կստանա, որ վիրաբուժական միջամտության կարիք կլինի»,- ասել էր նա:Ըստ գլխավոր դատաբժշկի՝ «հնարավոր է ոչ թե սեռական հարաբերություն, այլ ուրիշ բան է եղել»: 

Նշենք, որ ՀՀ քրեական օրենսգրքի 142-րդ հոդվածում թեեւ հստակ նշված չէ, թե որն է «ակնհայտ տասնվեց տարին չլրացած անձի նկատմամբ անառակաբարո գործողություններ կատարելը», սակայն մանկահասակին համբուրելը, սիրելը, շոյելը այդ գործողությունների շարքին են պատկանում:Ինչ վերաբերում է Գորիսում կատարված դեպքին, որ 14-ամյա աղջիկը հղիացել է, եւ պտղի հայրը նրա սեփական հայրն է, ապա այս գործով եւս սպասում են փորձաքննության արդյունքներին: Հիշեցնենք, որ աղջկա հղիությունը մոտ մեկ շաբաթ առաջ ընդհատվել է: Աղջիկն այժմ ՀՕՖ-ի կենտրոնում է:

Պատասխանատուների խոսքով, նա դեռեւս սթրեսի մեջ է ու չի շփվում ոչ մեկի հետ: Նրանք նաեւ հերքեցին լրատվամիջոցներից մի քանիսում տպագրվածը, թե աղջիկը հայտարարել է, որ հորից չի հղիացել: «Նման հայտարարություն չի արվել, ու կարծում ենք, դա քննչական մարմինների գործառույթն է»,-ասացին ՀՕՖ-ուհիները:

Արմեն Դավթյան

Read More

Վերջին անգամ հին ընտրական օրենսգրքով

Friday, June 17, 2011 Լուրեր, Հասարակություն, Սյունիք No Comments

Չնայած ՀՀ նախագահն արդեն իսկ ստորագրել է «ՀՀ ընտրական օրենսգիրքը», սակայն  Սյունիքի մարզի գյուղական համայնքներում հունիսի 19-ին կայանալիք  ՏԻՄ ընտրությունները անց կկացվեն գործող ԸՕ-ով: Թիվ 38 ընտրատարածքի 2 գյուղական համայնքներում կայանալիք  գյուղապետի ընտրություններում մրցակցություն չկա: 

Աղվանիում եւ Ուժանիսում առաջադրվել են գործող գյուղապետերը, ՀՀԿ-ականներ Աշոտ Սուքիասյանն ու Էդիկ Բեգլարյանը: Իսկ ահա թիվ 37 ընտրատարածքի Նորավանի համայնքի ավագանու ընտրություններում մրցակցություն է: Հինգ տեղի համար առաջադրվել է 6 թեկնածու, որից 3-ը` ԲՀԿ անդամներ են, 3-ը անկուսակցականներ: Ավագանու 6 թեկնածուներն էլ արական սեռի ներկայացուցիչներ են:

Արմեն Դավթյան, 
Կապան

Read More

Գնդապետը պատգամավո՞ր

Tuesday, June 14, 2011 Լուրեր, Սյունիք, Քաղաքական No Comments

Oրեր առաջ, մամուլում եղան հրապարակումներ, որ թիվ 37 ընտրատարածքում 2012թ-ի Աժ ընտրություններում մեծամասնական ընտրակարգով առաջադրվելու է Սյունիքի մարզպետ Սուրիկ Խաչատրյանը: Այս ընտրատարածքը ընդգրկում է Գորիսի ու Սիսիանի տարածաշրջանները ու ԱԺ պատգամավոր է ընտրվել ՀՀ նախագահի եղբայրը՝ Ալեքսանդր /Սաշիկ/ Սարգսյանը: Սակայն Սյունիքի մարզպետը հերքեց տարածված խոսակցությունը՝ ասելով, որ մտադիր չէ առաջադրվել: Նույն ընտրատարածքում առաջադրվելու է նախկին զինվորական, մասնագիտությամբ պատմաբան, ծնունդով սիսիանցի Վոլոդյա Հովհաննիսյանը: Գնդապետ Հովհաննիսյանը հայտնի է իր ըմբոստ հայտարարություններով, լինելով բանակային կորպուսներից մեկի փոխհրամանատարը, նա 2006-ին մի առիթով ասել էր. «Վազգենը կռվում էր հայրենիքի, ոչ թե փափկասուն Արմենչիկների համար»: Դրանից անմիջապես հետո Վ. Հովհաննիսյանի պաշտոնն իջեցվել է, բայց նա շարունակել է աշխատանքը ՊՆ-ում, հետագայում ոստիկանությունում՝ ներքին զորքերի հրամանատարի տեղակալի պաշտոնում, որտեղից մի քանի ամիս առաջ պաշտոնանկ է արվել եւ անցել կադրերի տրամադրության տակ:

Արմեն Դավթյան, Կապան

Read More

Փող ու անբարեհամբույր վերաբերմունք

Thursday, June 09, 2011 Կրթություն, Հասարակություն, Սյունիք No Comments

Կապանցիները կես կատակ-կես լուրջ որոշել են առաջարկել քաղաքապետարանին՝ անցկացնել մանկապարտեզների տնօրենների ատեստացիա: Եվ արդյունքում շարունակի աշխատել այն տնօրենը, ում ախորժակը փոքր է: Մանկապարտեզ հաճախող երեխաների ծնողները դժգոհում են, որ ավարտական խմբերում դաստիարակների ու տնօրենների համար նվերներ գնելու նպատակով փող են հավաքում: Նույնիսկ պատմում են, որ տնօրեններից մեկը դժգոհել է, որ իր նվերն էժան է դաստիարակի համեմատ:Իհարկե, ողջ ուսումնական տարվա ընթացքում երեխաներից ամսական 200-ական դրամ են հավաքում մանր-մունր բաներ գնելու համար: Ասենք՝ գրենական պիտույքներ, տնտեսական իրեր: Ծնողները դեմ չեն մանկապարտեզներին օգնելու՝ մեր երեխաների համար ենք անում: Սակայն դժգոհում են դաստիարակների վերաբերմունքից՝ անբարեհամբույր են: Նույնիսկ հանրապետության լավագույն դաստիարակի կոչման արժանացածի խմբից երեխաներին հանում, տանում այլ խումբ կամ մանկապարտեզ:  Կապանի քաղաքապետարանի կրթության, մշակույթի եւ սպորտի բաժնի պետ Անուշ Սիմոնյանը լրագրողների հետ զրույցում ասաց, որ մանկապարտեզներում արգելված է դրամահավաքությունը: «Նախկինում ֆոնդի համար 100-ական դրամ էին հավաքում, իսկ հիմա, Կապանի քաղաքապետի որոշմամբ, այդ գումարը տալիս է քաղաքապետարանը: Ավելին, մանկապարտեզներն ունեն հովանավորներ, ուստի զարմանալի է, որ նման բաներ կան»,- ասաց տիկին Սիմոնյանը: Վերջինս նաեւ նշեց, որ իրենք բողոք չեն ստացել, ու հորդորեց ծնողներին ներկայանալ քաղաքապետարան: Կապանի թվով 12 մանկապարտեզ 1350 երեխա է հաճախում:Վերջին տարիներին թիվն աճել է, ու մի քանի մանկապարտեզներում նույնիսկ մահճակալները չեն բավարարում, որպեսզի երեխաները քնեն: Իհարկե, ծնողները գնում են դրան՝ տեղյակ լինելով իրավիճակին: Ամեն դեպքում, պատասխանատուները գտնում են, որ նոր մանկապարտեզ կառուցելու խնդիր կա:

Արմեն Դավթյան, Կապան

Read More

Հարուցվել է քրեական գործ հոր նկատմամբ

Wednesday, June 08, 2011 իրավունք, Հասարակություն, Սյունիք No Comments

Սյունիքի  քննչական բաժանմունքում հարուցվել է քրեական գործ՝ ՔՕ 141 հոդվածով (սեքսուալ բնույթի գործողություններ կատարելը տասնվեց տարին չլրացած անձի հետ): Հիշեցնենք, որ օրեր առաջ Գորիսի ոստիկանություն էր դիմել Վ. Գ.-ն՝ տեղեկացնելով, որ որ իբրեւ ամուսինը՝ 45-ամյա Վրեժ Տիգրանյանը, սեռական հարաբերություն է ունեցել 15-ամյա դստեր հետ: Որովայնի շրջանում ունեցած ցավերի պատճառով մայրը նրան բժշկի է տարել, եւ պարզվել է, որ աղջիկը 3 ամսվա  հղիություն ունի: Քրեական գործի շրջանակներում դեռ նախաքննություն է ընթանում, նշանակված է դատագենետիկական փորձաքննություն: Վ. Տիգրանյանի նկատմամբ խափանման միջոց է ընտրվել ստորագրությամբ չհեռանալը: Իսկ աղջիկը տեղափոխվել է ՀՕՄ-ի երեխաների աջակցման կենտրոն: Նրա հետ աշխատում են հոգեբանները: Հիշեցնենք, որ աղջիկը անցած տարվա դեկտեմբերի 23-ից հաշվառված է Սյունիքի նյարդահոգեբուժական դիսպանսերում մտավոր հետամնացություն՝ վարքի խանգարում ախտորոշմամբ: Հոր նկատմամբ նույնպես նշանակվել է դատաբժշկա-փորձաքննական հետազոտություն եւ իրականացվում է Երեւանում: 

 Արմեն Դավթյան

Read More

Մեղավորը հայրն է՞. մոր պատմելով հայրը կենակցել է աղջկա հետ

Wednesday, June 01, 2011 Արտակարգ, Գորիս, Սյունիք No Comments

Մայիսի 31-ին, Սյունիքի ոստիկանության Գորիսի բաժին  մի քաղաքացի հայտարարություն է տվել, որ իբրև ամուսինը՝ 45-ամյա Վ. Տ. սեռական հարաբերություն է ունեցել 15-ամյա դստեր հետ, ինչի պատճառով վերջինս հղիացել է: Մոր պատմելով, դա ինքը իմացել է այն ժամանակ, երբ որովայնի շրջանում ցավեր ունենլու պատճաոռվ աղջկան տարել է բժշկի:  Գորիսի ոստիկանության բաժնի պետ Սևադա Առաքելյանը մեզ հետ ունեցած հեռախոսազրույցում նշեց, որ օպերատիվ կարգով ճշտվել է քաղաքացի Վ.Տ.-ի գտնվելու վայրը, ով  բերման է ենթարկվել ու ներկայացվել քննության: Վերջինս մայիսի 30-ին ընտանիքում  անախորժ զրույց ունենալուց հետո հեռացել էր անհայտ ուղղությամբ: Նշանակվել է դատաբժշկական փորձաքննություն, Գորիսի քննչական բաժանմունքում կատարվում է նախաքննություն:  Ինչ վերաբերում է այն խոսակցություններին, որ աղջիկը հաճախ ծեծի ու բռնության է ենթարկվել, ապա այդ մասին ոչ մի անգամ ոստիկանությունը ահազանգ չի  ստացել: Սյունիքի նյարդահոգեբուժական դիսպանսերի տնօրեն Արարատ Վարդանյանն էլ ասաց, որ երբեք իրենց մոտ բուժում չի ստացել ու հաշվառված չէ:

Արմեն Դավթյան

Read More

Սյունիքի գյուղացիների բիզնես-ծրագրերը մրցանակների են արժանացել

Monday, May 30, 2011 իրավունք, Սյունիք, Սպորտ No Comments

“Շիկահող” պետարգելոցի հարակից հինգ գյուղերի` Ծավի,  Սրաշենի, Ներքին Հանդի, Շիկահողի եւ Ճակատենի բնակիչներն էլ են խոստովանում, որ երբեք այսքան ոգեւորված չեն եղել: Գյուղացիների կողմից ներկայացված համայնքի զարգացման 51 բիզնես ծրագրերից 25-ը ճանաչվել են լավագույնը եւ արժանացել մրցանակների` յուրաքանչյուրը 100-120 հազար դրամ արժողության: Հաղթողներից 9-ը կանայք են, որոնց լրացուցիչ տրվել են նաեւ բջջային հեռախոսներ ու խոհանոցային էլեկտրական սարքավորումներ: Մրցանակների մեջ տեղ են գտել նաեւ զանազան խոհանոցային պարագաներ, գյուղատնտեսական աշխատանքային գործիքներ եւ այլն:

Ներքին Հանդ գյուղի բնակիչ Լաուրա Խալափյանի ու իր ամուսնու ծրագրերը եւս լավագույնների շարքում են: “Ես ներկայացրել եմ գյուղում խմորեղենի արտադրամասի հիմնման ծրագիր: Ինքս մասնագիտությամբ մանկավարժ եմ եւ աշխատում եմ գյուղի դպրոցում, նաեւ շատ եմ սիրում խմորեղեն պատրաստել եւ միշտ մտածել եմ նման ծրագրի իրականցման մասին: Ամուսնուս ներկայացրած ծրագիրը եւս շահել է, այն գյուղատնտեսության, կոնկրետ անասնապահության զարգացման վերաբերյալ է”, - ասում է նա:

Մրցույթն անցակցվել է Գերմանիայի Դաշնության տնտեսական զարգացման եւ համագործակցության նախարարությունը ներկայացնող KFW զարգացման բանկի ֆինասավորմամբ իրականցվող ””Շիկահող” պետարգելոցի հիմքի վրա կենսոլորտային տարածքի ստեղծման եւ շրջակա համայնքների սոցիալ-տնտեսական զարգացում” ծրագրի բաղադրիչ կազմող “Մրցույթ/մրցանակ” նախապատրաստական փուլի շրջանակներում:

“Ծրագրից սպասելիքները շատ են: Գյուղի յուրաքանչյուր օջախի բարեկեցության համար է արվում ամեն ինչ, որի անհրաժեշտությունն այսօր շատ է զգացվում”, - ասում է Ծավի գյուղապետ Արարատ Մարտիրոսյանը:

Ծրագրի պատասխանատուները նվերներից անմասն չեն թողել նաեւ գյուղերի մանկապարտեզների ու դպրոցների սաներին: SEF կազմակերպության հետ համատեղ նրանց են նվիրել խաղալիքներ ու պատկերազարդ գրքեր: Իսկ պետրագելոցի հերթական նվերը ժամանակակից հեռադիտակներն էին: Մինչ այդ նվիրել էին համակարգիչ, տպիչ մեքենա, գրենական պիտույքներ եւ այլն:

Դեռեւս ապրիլ ամսին “Մրցույթ/մրցանակ” բաղադրիչի շրջանակներում Շիկահողի ենթաշրջանի դպրոցների բոլոր 107 աշակերտները մասնակցել են ծրագրի կողմից անցկացված նկարչական մրցույթին եւ լավագույն 13 աշխատանքների հեղինակները պարգեւատրվել են արժեքավոր մրցանակներով, նաեւ յուրաքանչյուր մասնակից ստացել է անհատական նվերներ, իսկ մասնակից 5 դպրոցներին տրամադրվել են տարբեր դիդակտիկ նյութեր եւ գույք:

4 մլն եվրո արժողության այս ծրագրի իրականացման համար առաջարկվող 5 տարիների ընթացքում Շիկահողի ենթաշրջանը անհրաժեշտ աջակցություն կստանա UNESCO-ի ստանդարտներով “Մարդը եւ կենսոլորտը” ծրագրի շրջանակներում միջազգային ճանաչում ստանալու համար՝ որպես եզակի բնական արժեքներ պարունակող տարածք:

ԳՈՀԱՐ ԻՍԱԽԱՆՅԱՆ, Կապան

Read More

Վթար. BMW-ն Վաչագան գետում

Saturday, May 28, 2011 Արտակարգ, Լուրեր, Հասարակություն, Սյունիք No Comments

Սյունիքի մարզային քննչական բաժնի տեղեկատվության համաձայն,  մայիսի 28-ին, ժամը 3-ի  սահմաններում, Կապանի բնակիչ 26-ամյա Վարդան Գևորգյանը վարելով  BMW X5 մակնիշի 17 ԼՍ 778 պետհամարանիշի  ավտոմեքենան՝ կամրջից ընկել է Վաչագան գետը: Նա և ուղևորը՝ 23-ամյա Մասիս Անդրեասյանը փափուկ հյուսվածքների սալջարդով տեղափոխվել են Կապանի բժշկական կենտրոն: Վերջինս առավոտյան դուրս է գրվել, իսկ Վ.Գևորգյանը դեռ հիվանդանոցում է: Նրա վիճակը, բժիշկները կայուն են գնահատում: Սյունիքի մարզային քննչական բաժնում փաստի առնչությամբ նյութեր են նախապատրաստվում: Վթարը տեղի է ունեցել Սյունիքի մարզպետարանի մասնաշենքի մոտակայքում՝ Մ. Ստեփանյան ու Գ.Նժդեհ փողոցների հատման կամրջի մոտ: Այսօր  հատուկ տեխնիկայի օգնությամբ մեքենան եւ կամրջի ջարդված ճաղաշարերը դուրս են բերվել գետից:

Արմեն Դավթյան, Կապան

Read More

Պտտվիր, պտտվիր, կարուսել. երգը դեռ կլսվի

Friday, May 27, 2011 Կապան, Հասարակություն, Մշակույթ, Սյունիք No Comments

Արտակարգ իրավիճակների նախարարության տեխնիկական անվտանգության ազգային կենտրոնի պետ  Աշոտ Պետրոսյանի տեղեկատվությամբ, այս տարի անցկացրած փորձաքննության արդյունքում Կապանում դադարեցվել է 4 կարուսելի գործունեություն, մեկն էլ ապամոնտաժվել է։ Սակայն Կապանի Վազգեն Սարգսյանի անվան մանկական զբոսայգու բոլոր կարուսելները գործում են։ Մեզ հետ հեռախոսազրույցում Աշոտ Պետրոսյանը հաստատեց իր հայտարարությունը եւ առաջին անգամ մեզնից լսեց, որ Կապանում կարուսելները, բացի ապամոնտաժվածից, աշխատում են։  

Կենտրոնը, ըստ Աշոտ Պետրոսյանի, դրանց վերաբերյալ տվել է բացասական եզրակացություն։ Սակայն զբոսայգու տնօրեն Սեյրան Հայրապետյանը կտրականապես հերքեց, որ իրենց արգելվել է աշխատել։  Զրուցակցիս խոսքով, կենտրոնը  պահանջում է այնպիսի միջոցառումներ, որ անհնար է իրականացնել: «Ասենք, աշխատակազմի վերապատրաստում: Որտեղ՝ չեն ասում: Թող ցույց տան մի տեղ, որ նման դասընթաց է կազմակերպվում, ու մենք կգնանք՝ չենք զլանում»,- ասաց տնօրենը: Կամ, ասենք, լիցենզավորված կազմակերպությունն է պետք, որ իրականացնի նորոգման աշխատանքներ: Փաստորեն, այդպիսի կառույց էլ չկա:

Ս. Հայրապետյանի խոսքով, մյուս  բոլոր փաստաթղթերը կարգին են։ Մեր այն հարցին, թե այդ դեպքում որտեղ են փորձաքննության դրական արդյունքները հավաստող փաստաթղթերը, ասաց, որ Երեւանից օրերս կուղարկվեն։ Տեխնիկական անվտանգության ազգային կենտրոնի պետի խոսքով էլ, շահագործելու իրավունք ունեցող կարուսելներին պետք է փակցված լինի համապատասխան թույլտվությունը՝ կնքված ու ստորագրված կենտրոնի կողմից։ Այնուամենայնիվ, զբոսայգու եւ ոչ մի կարուսելի վրա  համապատասխան թույլտվություն չկար։ Ի դեպ, տնօրենի խոսքով, իրենք 2 կարուսել ունեն՝ «Ռամաշկա» եւ «Ուրախ բլուրներ»: Մնացած 3-ը համարվում են ճոճանակներ: Զբոսայգու այցելուներին այնքան էլ չէր հետաքրքրում անվտանգության խնդիրը:

«Դե էդքան լավ չգիտենք, գուցե վտանգավոր է, բայց երեխան ուզում է՝ ստիպված ես բերել ու հետը նստել»,- ասում է տիկին Ժաննան: Ստացվում է այնպես, որ 50-100 դրամի պատճառով կարող է վտանգվել երեխաների կյանքը: Զբոսայգու տնօրենն անձամբ իր թոռներին է բերում կարուսել։ Առաջին հերթին ինքն է մտահոգ, որ սարքավորումներն անվտանգ լինեն: «Ես եմ, չէ՞, պատասխան տալու, ես կուզե՞մ, որ մի բան էն չլինի»,-ասում է նա:

Փաստ է, որ վերահսկող գործուն մի կառույց է անհրաժեշտ։ Ի դեպ,  արտակարգ իրավիճակների նախարարության տեխնիկական անվտանգության ազգային կենտրոնի Սյունիքի ստորաբաժանման պետ Ռուբեն Մարտիրոսյանն էլ մեզ ասաց, որ ինքը պահակ չէ, որպեսզի հսկի իրենց ենթակայության տակ գտնվող 1200-ից ավելի սուբյեկտներին։ «Կա որոշում՝ պարտավոր են ենթարկվել»,- ասաց նա։ Նշենք նաեւ, որ «Տեխնիկական անվտանգության ապահովման պետական կարգավորման մասին» ՀՀ օրենքով, տնտեսվարող սուբյեկտները տուգանք պետք է  վճարեն, եթե շահագործում են առանց համապատասխան թույլտվության։

Արմեն ԴԱՎԹՅԱՆ Կապան

Read More

Էլի կարկուտ ու վնաս

Friday, May 27, 2011 գյուղատնտեսություն, Լուրեր, Պատահար, Սյունիք No Comments

Մինչ  հաշվարկվում են մայիսի 22-ին ուժեղ կարկտահարության հասցրած վնասները, մայիսի 27-ին մոտ 15 րոպե կարկուտ տեղաց մարզի 5 համայնքներում: Առավել տուժել են Նորաշենիկ, Շրվենանց, Առաջաձոր, Ձորաստան,՚ Ներքին Խոտանան գյուղերը: Առաջաձորի գյուղապետ Դավիթ Մովսեսյանի պատմելով, սելավի հետևանքով հարևան՝ 1 կմ հեռավորության վրա գտնվող Ն. Խոտանանի ավազահանքերից ավազը հասել է Առաջաձոր: Կարկուտը քանդել է կարտոֆիլի ցանքսերը, գյուղացիները դույլերով կարտոֆիլ են հավաքել: Նորաշենիկցի Մելսիկ Ղազարյանի խոսքով էլ՝ նա վախեցել է անասունների համար:”Էդ հեղեղին ու կարկուտին վազեցի գոմ, ասի տավարիս բան չդառնա, սոված մնանք”,-ասում է նա: 

Հիշեցնենք, որ օրեր առաջ կարկուտից տուժել էին Կապանի տարածաշրջանի 7 եւ Մեղրու տարածաշրջանի 6 համայնքներ: Մասնավորապես, Ուժանիս համայնքի գյուղատնտեսությանը հասցրած վնասը կազմում է  40 %, Մեղրու տարածաշրջանի Վահրավար գյուղը 4 մլն դրամի վնաս է կրել, նույնքան վնաս է հաշվարկվել նաեւ Սյունիք գյուղում:   

Մեղրու տարածաշրջանի Լեհվազ գյուղում կարկուտի հասցրած ընդհանուր վնասը կազմում է  25-30%, 40%-ի չափով տուժվել է  Եղվարդ գյուղի գյուղատնտեսությունը:  Խդրանց գյուղում գյուղատնտեսությունը տուժել է ամբողջովին, գյուղացիները նույնիսկ 1 կգ բերքի հույս էլ չունեն: Նշենք, որ այստեղ 45 րոպե կարկուտ է տեղացել ու ամնե ինչ հողին է հավասարվել:

Արմեն Դավթյան, Կապան

Read More

ՀՖՖ նախագահը հանուն ֆուտբոլի՝ ջիճեց

Tuesday, May 24, 2011 Լուրեր, Հասարակություն, Սյունիք, Սպորտ No Comments

Կապանի «Գանձասարը» կշարունակի մասնակցել ֆուտբոլի Հայաստանի բարձրագույն խմբի առաջնությանը։ Նման որոշում կայացվեց Հայաստանի ֆուտբոլի ֆեդերացիայի նախագահ Ռուբեն Հայրապետյանի և ակումբի ղեկավարության, երկրպագուների հետ  Կապանում կայացած հանդիպման ժամանակ։ Հիշեցնենք, որ ՀՖՖ կարգապահական կոմիտեն «Փյունիկ»-ի հետ խաղից հետո որոշել էր, որ   «Գանձասար»-ը 5 հանդիպում պետք է անցկացներ առանց հանդիսականների։ Սրան հետևել էր «Գանձասար»  Ֆ/Ա-ի նախագահ, ԶՊՄԿ-ի գլխավոր տնօրեն Մաքսիմ Հակոբյանի հայտարարությունը,  որ թիմը դուրս  է գալու առաջնությունից, եթե ՀՖՖ-ն չվերանայի որոշումը։ 

Նշենք, որ խաղադաշտ էր նետվել մի պոլիէթելանյին շիշ ու երկրպագուները դժգոհ լինելով մրցավարներից՝ հայոհոյել էին նրանց։ Ռուբեն Հայրապետյանի խոսքով, չի կարելի հայհոյել խաղադաշտում, հետո տեսագրությունները նայում են։ 

«Ես ուզում եմ բոլոր խաղերը եթեր տալ։ Բա որ Կապանում լինի, ոնց ենք անելու, մրցավար եմ նշանակում Կապան, չեն գալիս»,-ասաց ՀՖՖ-ի նախագահը։  «Սխալ դատող մրցավարները պատժվում են դրա համար կարգ կա։ Ես թույլ չեմ տա որևէ մեկին «սամասուդ» անել»,- ասաց նա՝ ավելացնելով, որ ինքը շանտաժներից չի վախենում։ 

Կապանցի երկրպագուները առաջարկեցին կին մրցավարներ ուղարկել Կապան, իսկ քաղաքապետ Արտուր Աթայանը ՀՖՖ-ի այդ քայլը «դաժան որոշում» համարեց։ Երկրպագուներից մեկը առաջարկեց ստադիոն գնալ կանանց հետ, որպեսզի նման բան չկրկնվի։ Լսելով երկրպագուներին՝ ՀՖՖ-ի նախագահը զիջեց. «Ճիշտն ասաց ճանապարհին գալիս՝  մտածում էի, ու արդեն վճռել էի, որ մեկ խաղ զրկեմ հանդիսականներից, սակայն հիմա հայտարարում եմ՝ փոխում եմ նախկին որոշումս և «Գանձասար»-ին պայմանական պատիժ եմ տալիս։ Այսինքն անկարգությունը կրկնվելու դեպքում 5 խաղ թիմը կանցկացնի առանց երկրպագուների»,-ասաց Ռ. Հայրապետյանը։ 

«Գանձասարի» երկրպագուները ծափահարություններով ընդունեցին նման որոշումը։   

«Գանձասար» Ֆ/Ա նախագահ  Մաքսիմ Հակոբյանը հանդիպման արդյունքները բավականին գոհացուցիչ է համարում։ Վերջինս  չի կարծում, որ նրա՝ առաջնությունից թիմի դուրս գալու հայտարարությունն է նպաստել, որ ՀՖՖ-ի նախագահը վերանայի որոշումը։ Ըստ զրուցակցիս, այդ հայտարարությունը առաջին հերթին  նախազգուշացում էր երկրպագուներին։ Կապանը ֆուտբոլային գեղեցիկ ավանդույթներ ունեցող քաղաք է, ու չպետք է կորցնի իր մարզական դեմքը, համոզված է Մաքսիմ Հակոբյանը։ «Գանձասար» Ֆ/Ա-ի նախագահի խոսքով, Կապանում, Քաջարանում աշխատանքներ են իրականացվում մանկապատանեկան ֆուտբոլը զարգացնելու համար, ու մոտ ապագայում «Գանձասար»-ի հիմնական կազմը կհամալրվի տեղացիներով, ինչու չէ վերջիներս կընդգրկվեն այլ թիմերում : 

Արմեն Դավթյան, Կապան

Read More

Թուրք լրագրողները հանդիպել են գորիսեցիներին

Tuesday, May 24, 2011 Գորիս, Հասարակություն, Սյունիք No Comments

Գորիս ժամանած հայ և  թուրք 16 լրագրողներ "Ռեսուրս կենտրոն" հիմնադրամում հանդիպեցին   հանրության տարբեր շերտերի հետ: Մինչ հյուրերը կժամանեին, ներկաների մոտ  մի տեսակ  անհանգստություն   կար. նրանց հետ  առերես  խոսելու ու պատմական մի շարք հարցեր քննարկելու առումով:   

Չնայած հետաքրքրությունների շրջանակաը քաղաքական համատեքստում էր` այնուամենայնիվ մուտքի հարցադրումները վերաբերում էին երկու երկրների տնտեսական իրավիճակին: Թուրք լրագրողներին հետաքրքրում էին` Հայաստանում կանայք ինչպիսի մասնակցություն ունեն  երկրի տնտեսական զարգացման գործում: Նկատել  էին, որ մեր երկրում ամեն քայլափոխի  թուրքական ապրանքներ են վաճառվում, մինչդեռ Թուրքիայում հայկական արտադրության ապրքանքներ չկան: Մտահոգություն հայտնեցին, որ հավասար պայմաններն ու հնարավորությունները բացակայում են:

Տնտեսական թեմայի շուրջ քննարկումը թուրք լրագրողները միանգամից, սահուն  տարան դեպի հետաքրքրող թեման:
 

Ինչ վերաբերում է հայ թուրքական հարաբերություններին, թուրքերը նշեցին`

դիվանագիտական հարաբերությունները մի բան են, պատմության հետ առերեսվելը՝ մի այլ բան: Թուրքիան այդ բարոյական ուժը չունի և Հայաստանի հանդեպ պարտք ունի մարելու:

Նրանց հավաստմամբ`Թուրքիայի 90 տոկոսը Ղարաբաղի տեղը չգիտի: Քաղական գործիչները  քարոզում են՝ Ղարաբաղը հայերն են  գրավել, նրանք նաև հեռացել են, որ Թուրքիային մեղադրեն ցեղասպանության մեջ: Նշեցին, որ իրենց երկրի համար ամոթալի է:

"Ինչպիսին է թուրք երիտասարդների դիրքորոշումը երկու երկրների դիվանագիտական հարաբերությունների կարգավորման և երկխոսության առումով",- հարցին ի պատասխան, նշեցին",- "Թուրք երիտասարդները կողմնակից են հարաբերությունների կարգավորմանը, սակայն  շատերը փորձում են օգտագործել նրանց":

"Կիսո՞ւմ եք թուրքական դիվանագիտության հզոր լինելու մասին գոյություն ունեցող կարծիքը" հարցին, ավելացրեցին,- "Ոչ թե թուրքական դիվանագիտությունն է հզոր, այլ պարզապես Թուրքիայի բախտն է բերում":

Հանդիպման վերջում  թուրք լրագրողները խոսեցին նաև Հայաստան կատարած այցի ընթացքում ստացած տպավորությունների մասին, նշելով` եթե մի տեղ պահես 10 թուրքի, 10 հայի, 10 քրդի և 10 օր հետո նրանց այցի գնաս, այնտեղ ամեն ինչ խաղաղ կլինի: Պատասխանից հետո հնչած "Կամ էլ բոլորը հայ դարձած կլինեն" գորիսյան կարծիքը աշխուժության առիթ դարձավ:

Չնայած ի սկզբանե լարված հանդիպում էր սպասվում, բայց հյուրերն, իսկապես, անկեղծ էին. պատմական փաստերի մասին խոսում էին ազատ ու անկաշկանդ:

Հանդիպումը Երևանի Մամուլի ակումբի իրականացրած "Հայաստան-Թուրքիա երկխոսության զարգացում" ծրագրի շրջանակներում էր:

Թուրքիայից ժամանած լրագրողները, ըստ Երևանի Մամուլի ակումբի ներկայացուցիչ Հայկակ Արշամյանի,  Թուրքիայի առաջատար լրատվամիջոցների ներկայացուցիչներ են:

Ստորև՝ հայ և թուրք լրագրողների խմբի անվանացանկն ու նրանց ներկայացրած լրատվամիջոցներն են /Երևանի Մամուլի ակումբի ներկայացմամբ/:.

1. Sona Kocharyan, Yerkir Media TV
2. Astghik Karapetyan, Yerkir
3. Kristine Aghalarian, Hetq.am
4. Tigran Tadevosyan, Photolure
5. Andranik Ispiryan, News.am
6. Armen Shahoyan, cameraman
7. Haykak Arshamyan, Yerevan Press Club
8. Onur Usta, Zaman newspaper
9. Özgün Özçer, Taraf newspaper
10.Mehmet Ali İzmir, Star newspaper
11.Hakkı Özdal, Radikal newspaper
12.Aysel Yaşa, Yeni Safak newspaper
13.Narod Maraşlıyan, GPoT
14.Burcu Balıktaş, Bianet.org

 Հեղինակ` Իրինա Յոլյան

Read More