ՀՀ կառավարության կողմից հատկացված միջոցներով Կոտայքի մարզում կատարվող աշխատանքներին ծանոթանալու նպատակով երեկ ՀՀ փոխվարչապետ, տարածքային կառավարման նախարար Արմեն Գևորգյանը Կոտայքի մարզում էր: Շուրջ 1մլրդ. 318 մլն. դրամ արժողությամբ ծրագրի շրջանակներում մարզի 34 համայնքներում նախատեսված է լուծել առաջնահերթություն պահանջող մի շարք խնդիրներ. մասնավորապես կատարել ոռոգման համակարգերի, խմելու ջրագծերի վերանորոգման ու կառուցման, հանրակրթական և նախադպրոցական ուսումնական հաստատությունների, մշակութային օջախների շենքերի հիմնանորոգման ու լոկալ ջեռուցման համակարգերի կառուցման, ներհամայնքային ճանապարհների, բազմաբնակարան շենքերի տանիքների վերանորոգման և այլ աշխատանքներ:
Նախադպրոցական հաստատությունների հիմնանորոգման աշխատանքներ են իրականացվում մարզի Զովունի, Նոր Գեղի և Քաղսի համայնքներում: Արմեն Գևորգյանը մարզպետ Կավալենկո Շահգալդյանի հետ միասին շրջեց վերոնշյալ համայնքներում և ծանոթացավ մանկապարտեզների վերանորոգման աշխատանքների ընթացքին, պատասխանատուների հետ քննարկեց աշխատանքների որակն ու ժամկետները: Մանկապարտեզները վերանորոգվելու և կահավորվելու են ժամանակակից պահանջներին համապատասխան:
«Անհանգստացնող հանգամանքներ որակի առումով չկան , հույսով եմ, որ մեր երեխաները սեպտեմբերի 1-ից կվայելեն նոր շենքային պայմանները»,- նշեց փոխվարչապետը:
Տարածքային կառավարման նախարարը այցելեց նաև մարզկենտրոն Հրազդան և ծանոթացավ այստեղ Համաշխարհային բանկի և Ասիական զարգացման բանկի ֆինանսավորմամբ Հրազդան քաղաքի ջրամատակարարման բարելավման ծրագրի շրջանակներում իրականացվող խմելու նոր ջրագծի կառուցման շինարարական աշխատանքներին, եղավ պոմպակայանում և համապատասխան լաբորատորիայում: Նախատեսվում է, որ նոր ջրագիծը հնարավորություն կտա վերացնել ջրի տեխնիկական կորուստները և առավել արդյունավետ օգտագործել ջրային ռեսուրսները: Իսկ որակյալ ջրամատակարարումը կասկածի տակ չի դրվում:
«Կառուցվում է ներքին ցանց`շուրջ 120կմ երկարությամբ, և մենք տարվա վերջին Հրազդան քաղաքի բնակիչներին կմատակարարենք որակյալ ջուր, իսկ ջրամատակարարման ժամանակացույցը կկազմի 15-16 ժամ»,-տեղեկացրեց Կոտայքի մարզպետ Կավալենկո Շահգալդյանը:
Մարզպետարանում Արմեն Գևորգյանի գլխավորությամբ կայացած խորհրդակցության ընթացքում քննարկվեցին ծրագրի իրականացման ուղղությունները: Փոխվարչապետը մանրամասն ծանոթացավ նոր ջրագծի կառուցման արդյունքում ջրամատակարարման բարելավման հնարավորությունները, առկա խնդիրներին և դրանց լուծման ճանապարհներին:
0 коммент.:
Post a Comment
Note: Only a member of this blog may post a comment.